20 ildən sonra ARB TV-dən ayrılır

“Kriminal” verilişinin aparıcısı Ceyhun Həmidov ARB TV-dən ayrılacağını açıqlayıb.

hadiseler.info xəbər verir ki, aparıcı bu barədə sosial şəbəkə hesabında paylaşım edib.

Ceyhun Həmidov bildirib ki, kanaldan öz istəyi ilə deyil, rəhbərliyin qərarı ilə ayrılmalı olacaq. Onun sözlərinə görə, bu qərar sentyabrın əvvəlində, məzuniyyətdən qayıtdıqdan sonra ona bildirilib və səbəb kimi “vəzifə ixtisarı və kanalın strukturunun dəyişdirilməsi” göstərilib.

“Bu gün də suallarım qalır və onlara cavab gözləyirəm”, — deyə aparıcı qeyd edib.

Hazırda ARB-də fəaliyyətini davam etdirdiyini, çəkilişlərin getdiyini və yeni mövsüm üçün buraxılışların hazırlandığını deyən C.Həmidov kanalda 20 ilə yaxın fəaliyyət göstərdiyini xatırladıb. O, verilən qərarın onun üçün ağır olduğunu vurğulayıb: “20 ilə yaxın müddətdən sonra verilən qiymətə sadəcə heyranam. Söz tapmıram, çox çətin hissdir. Çox təəssüf edirəm”.