24 saata 40 hava zərbəsi: Yəməndə şiddətli döyüşlər davam edir  

Yəmən hökumət qüvvələri ilə “Ənsar Allah” hərəkatı arasında strateji ərazilərdə hərbi əməliyyatlar kəskinləşib.

hadiseler.info xəbər verir ki, bu barədə “Al Jazeera” və “Al Masirah” telekanalları məlumat yayıb.

Hökumətə bağlı “Vətən Qalxanı” qüvvələri Bab əl-Məndəb boğazı yaxınlığındakı strateji Kəhbub dağları istiqamətində husilərin sızma və hücum cəhdinin qarşısını alıblar. Əməliyyat zamanı düşmənin hərbi texnikası sıradan çıxarılıb, 1 PUA vurulub və 2 husi döyüşçüsü əsir götürülüb.

Öz növbəsində, husilərə məxsus media Səudiyyə Ərəbistanı koalisiyasının Həccə əyalətinin Abs şəhərini bombaladığını, 1 nəfərin öldüyünü və 1 nəfərin yaralandığını bildirib. Husilər son 24 saatda koalisiyanın 40 hava zərbəsi endirdiyini və rabitə qüllələrini hədəf aldığını iddia ediblər. Hərəkat buna cavab olaraq Səudiyyə Ərəbistanının Yanbu limanına, Xamis Muşayt aviabazasına zərbələr endirdiyini və krallığın “F-15” qırıcı təyyarəsini vurduğunu bəyan edib.