“28 May–Nizami” xəttində 100-ə yaxın avtobus cəlb olunub – AYNA

Bakı metrosunun “28 May–Nizami” xəttində hərəkətin vaxtaşırı saxlanılması və xətlərin ayrılması layihəsi ilə əlaqədar Azərbaycan Yerüstü Nəqliyyat Agentliyi (AYNA) tərəfindən 6 yeni ekspress marşrut təşkil olunub.

hadiseler.info “Bakıvaxtı.az”a istinadən xəbər verir ki, bu barədə AYNA-nın mətbuat katibi Tural Orucov açıqlama verib.

Məlumata görə, 28 May Nəqliyyat Mübadilə Mərkəzindən, “20 Yanvar” və “Elmlər Akademiyası” metrostansiyalarından istiqamətlənən M1, M2, M3, M4, M5 və M6 nömrəli ekspress xətlər fəaliyyətə başlayıb. Sərnişinlər bu xətlər vasitəsilə “Nizami”, “İnşaatçılar”, “Gənclik” və “Koroğlu” stansiyaları istiqamətində rahat hərəkət edə bilərlər.

Mövcud 20 müntəzəm marşrut xəttinə 100-ə yaxın əlavə avtobus cəlb olunub. Eyni zamanda, sərnişinlərə yönləndirmə və məlumatlandırma məqsədilə mühüm metrostansiyaların çıxışlarında nəqliyyat könüllüləri fəaliyyətə başlayıb.