İrandan PUA ilə Azərbaycana böyük partiyada narkotik keçirilməsinin qarşısı alındı

Dövlət Sərhəd Xidmətinin (DSX) keçirdiyi növbəti əməliyyat nəticəsində İrandan hava yolu ilə ölkəmizə qanunsuz yolla keçirilməyə cəhd edilən iri miqdarda narkotik vasitələr və psixotrop maddələr aşkar edilərək götürülüb.

hadiseler.info xəbər verir ki, DSX Sərhəd Qoşunlarının “Horadiz” sərhəd dəstəsinin xidməti ərazisində ümumilikdə 38 kiloqram 778 qram narkotik vasitə və 7680 ədəd psixotrop tərkibli “Metadon M-40” həbi ələ keçirilib.

Məlumata görə, gecə saat 01:30 radələrində pilotsuz uçuş aparatı (PUA) vasitəsilə sərhəddən keçirilən 21 kiloqram 700 qram narkotik vasitə və 1000 ədəd Metadon həbi, saat 04:10-da isə paraplan vasitəsilə keçirilən 17 kiloqram 78 qram narkotik vasitə və 6680 ədəd psixotrop həb sərhədçilər tərəfindən müəyyən olunaraq dövriyyədən çıxarılıb.

Faktlar üzrə əməliyyat-istintaq tədbirləri davam etdirilir.