COP31-in keçiriləcəyi məkanla bağlı detallar açıqlanıb

Türkiyənin Antalya şəhərində keçiriləcək COP31 sammiti üçün ümumi sahəsi 1,5 milyon kvadratmetr olan tədbir ərazisi hazırlanıb.

hadiseler.info xəbər verir ki, bu barədə Türkiyə Respublikasının Ətraf Mühit, Şəhərsalma və İqlim Dəyişikliyi Nazirliyinin Dəstək Xidmətləri İdarəsinin rəisi Ahmet Sami Kulaklıoğlu “Bakı İqlim Fəaliyyəti Həftəsi 2026” çərçivəsində keçirilən “COP31 üzrə logistika brifinqi”ndə məlumat verib.  

O bildirib ki, COP31 ərazisində “Mavi Zona” və “Yaşıl Zona” vahid məkanda yerləşəcək: “COP31 ərazisi ümumilikdə 1,1 milyon kvadratmetr sahədə qurulub. Bunun təxminən 527 min kvadratmetri “Mavi Zona”nın, 582 min kvadratmetri isə “Yaşıl Zona”nın payına düşür. Ətraf ərazilərin abadlaşdırılması və avtodayanacaqlarla birlikdə ümumi sahə 1,5 milyon kvadratmetrə çatır”.

Nazirlik rəsmisinin sözlərinə görə, 11-12 noyabr tarixlərində keçiriləcək Liderlər Sammiti üçün ayrıca VIP giriş nöqtəsi nəzərdə tutulub. VIP girişindən yalnız liderlər və onların üç nəfərdən ibarət heyəti istifadə edərək qarşılama məntəqəsinə və VIP zalına keçə biləcəklər.

Ahmet Sami Kulaklıoğlu Antalyanın COP31 iştirakçılarını qəbul etmək üçün geniş logistik imkanlara malik olduğunu vurğulayıb.