Fransada muzeydən 18 milyonluq 2 tablo oğurlandı

Fransanın Kany-syur-Mer şəhərində yerləşən “Renuar” muzeyindən məşhur rəssam Ogyüst Renuara aid 9 milyon avro (təxminən 18 milyon manatdan çox) dəyərində iki qiymətli əsər oğurlanıb.

hadiseler.info xəbər verir ki, soyğunçular muzeydən dörd tablo çıxarsalar da, polisin əraziyə gəldiyini görüb ikisini həyətdə ataraq qaçıblar.

Qarətçilər Parisdəki “d’Orse” Muzeyindən müvəqqəti gətirilmiş “Madame Colonna Romano” və “Jeune Femme au Puits” tablolarını aparmağa müvəffəq olublar.

Oğurlanan tablolardan birinin tarixi İkinci Dünya müharibəsinə dayanır. Həmin əsər faşist işğalı dövründə yəhudi kolleksiyaçıdan məcburi alınıb, sahibi isə Avşvits həbs düşərgəsində qətlə yetirilib.

Qeyd edək ki, bu hadisə “Luvr” və “Lalik” muzeylərindəki son oğurluqlardan sonra Fransada mədəniyyət müəssisələrinin təhlükəsizliyi məsələsini yenidən kəskin gündəmə gətirib.