Ramiz Mehdiyevin cinayət işi üzrə dindirilən yeni şahidlər- ADLARI

Azərbaycanın siyasi hakimiyyətində uzun illər mühüm postlar tutmuş Ramiz Mehdiyevin cinayət işi üzrə Dövlət Təhlükəsizliyi Xidmətində (DTX) şahid qismində ifadə verən daha bir neçə şəxsin şəxsiyyəti məlum olub.

hadiseler.info xəbər verir ki, dindirilənlər arasında Ramiz Mehdiyevin Bakı Dövlət Universitetində kafedra müdiri işləyən qızı Kamilə Əliyeva, kürəkəni İlham Əliyev, ləğv edilmiş “Bank BTB”nin əsas səhmdarı olan gəlini Nigar Mehdiyeva, sözügedən bankın Müşahidə Şurasının sədri və səhmdarlarından Sadiq Rza İsmayıl, “Şərq-Qərb” Nəşriyyatının direktoru Sevil İsmayılova, həmçinin AXCP sədri Əli Kərimli və müavini Məmməd İbrahim yer alır. DTX-də dindirilən bu şəxslərin məhkəmə istintaqı zamanı da şahid qismində ifadə verəcəkləri gözlənilir.

Qeyd olunub ki, 88 yaşlı Ramiz Mehdiyevin ilk məhkəmə iclası sentyabrın 21-də Bakı Ağır Cinayətlər Məhkəməsində keçiriləcək. Keçmiş Administrasiya rəhbəri və AMEA prezidenti hazırda dövlətə xəyanət, hakimiyyəti zorla ələ keçirməyə yönələn hərəkətlər, külli miqdarda rüşvət alma və cinayət yolu ilə əldə edilmiş əmlakı leqallaşdırma maddələri ilə təqsirləndirilir. İttihamların ikisi ömürlük azadlıqdan məhrumetmə cəzasını nəzərdə tutsa da, qanunvericiliyə əsasən cinayət törədərkən 65 yaşdan yuxarı olan şəxslərə ömürlük cəza verilə bilməz.