Ucarda yaşayış evi yanıb kül oldu – FOTOLAR

Ucar rayonunun Qazqumlaq kəndində yaşayış evinin kül olması ilə nəticələnən ağır yanğın hadisəsi baş verib.

hadiseler.info xəbər verir ki, kənd sakini Rüstəmov Vüsal Ərziman oğluna məxsus 3 otaqlı, ümumi sahəsi 110 kvadratmetr olan ev əşyaları ilə birlikdə tamamilə yanaraq yararsız hala düşüb.

İlkin ehtimallara görə, yanğın həyətdə yığılmış ot bağlamasının alışması və alovun sürətlə yaşayış evünə keçməsi nəticəsində baş verib. Yanğın zamanı həyətdə saxlanılan 12 ton ot bağlaması da tamamilə yanıb.

Hadisə yerinə dərhal Ucar rayon Dövlət Yanğından Mühafizə Hissəsinin texnikası və canlı qüvvəsi cəlb olunub. FHN əməkdaşlarının müdaxiləsi ilə yanğın söndürülüb, yaxınlıqdakı digər evlər alovdan mühafizə edilib.

Hadisə zamanı xəsarət alan və ya həyatını itirən olmayıb. Faktla bağlı müvafiq qurumlar tərəfindən araşdırma aparılır.