“Crocus”dakı terror aktları ilə bağlı olan şəxs ABŞ-də 20 il həbs cəzası aldı

2021-ci ildə ABŞ qoşunlarının Əfqanıstandan çıxarılması zamanı Kabil hava limanında törədilən partlayışın təşkilatçılarından olan İŞİD üzvü Məhəmməd Şərifullah ABŞ-də 20 il müddətinə azadlıqdan məhrum edilib.

hadiseler.info “TASS”a istinadən xəbər verir ki, bu barədə ABŞ Ədliyyə Nazirliyinin mətbuat xidməti məlumat yayıb.

Məlumatda bildirilir ki, Məhəmməd Şərifullah həmçinin 2024-cü ildə Moskva vilayətinin Krasnoqorsk şəhərində yerləşən “Crocus City Hall” konsert zalında törədilən qanlı terror aktının koordinasiyasında da iştirak edib.

İstintaq materiallarına əsasən, o, 2021-ci ildə Kabil hava limanının əsas girişinə aparan yolda kəşfiyyat apararaq terrorçulara yolun açıq olduğunu bildirib. Bir neçə saat sonra törədilən partlayış nəticəsində 13 ABŞ hərbçisi və 160-dan çox dinc sakin həlak olub. “Crocus City Hall” hücumu zamanı isə o, terrorçulara Kalaşnikov (AK) avtomatlarından istifadə üzrə təlimatlar verib və onlarla birbaşa əlaqə saxlayıb.

2016-2025-ci illər ərzində İŞİD-in 10-dan çox hücumunda iştirak edən Şərifullah 2025-ci ildə Pakistan-Əfqanıstan sərhədi yaxınlığında saxlanılaraq ABŞ-yə ekstradisiya olunub. Dindirilmə zamanı o, Kabil, Rusiya və İran ərazilərindəki hücumlarda rolunu etiraf edib.

Xatırladaq ki, “Crocus City Hall”da baş verən terror aktı nəticəsində 145 nəfər həlak olub.