Prezident və birinci xanım Pir Ömər Sultan ziyarətgahında aparılan konservasiya işləri ilə tanış olublar

Azərbaycan Respublikasının Prezidenti İlham Əliyev və birinci xanım Mehriban Əliyeva sentyabrın 17-də Şamaxı rayonunun Avaxıl kəndində yerləşən Pir Ömər Sultan ziyarətgahında aparılan konservasiya işləri ilə tanış olublar.

hadiseler.info xəbər verir ki, məlumatı AZƏRTAC yayıb. Məlumata əsasən, dövlət başçısı və birinci xanım 2020-ci ildə Şamaxıya səfərləri zamanı ziyarətgahda olmuş və burada konservasiya işlərinin aparılmasına dair tapşırıqlar vermişdilər.

Ötən müddət ərzində Heydər Əliyev Fondunun dəstəyi ilə çay və qaya daşlarından tikilmiş qalıqlar konservasiya edilib. Tədqiqatlar zamanı xəlvətilik təliminin banisi Pir Ömər Avaxılıya və başqa şəxslərə aid 8 qəbir aşkar olunaraq səliqəyə salınıb. Ziyarətgahın qorunması üçün divar hörülüb, üzərində 16 metr hündürlüyündə səkkizbucaqlı çardaq qurulub və ziyarətçilər üçün gəzinti zolağı yaradılıb.