Husilər Səudiyyə Ərəbistana raket və PUA zərbələri endiriblər

Yəməndəki husi üsyançıları Səudiyyə Ərəbistanının paytaxtı Ər-Riyad şəhərində strateji və həssas nöqtələrə balistik raketlər və pilotsuz uçuş aparatları ilə hücum təşkil ediblər.

hadiseler.info xəbər verir ki, bu barədə “Reuters” informasiya agentliyi məlumat yayıb.

Hücum nəticəsində Ər-Riyaddakı Kral Xalid Beynəlxalq Hava Limanı yaxınlığında yerləşən “Aramco” neft şirkətinə ait yanacaq saxlama anbarında yanğın baş verib. Səudiyyə Ərəbistanının Hava Hücumundan Müdafiə Qüvvələri atılan balistik raketi vuraraq zərərsizləşdirdiyini bildirsə də, şəhərdə partlayış səsləri eşidilib və uçuşlarda ciddi gecikmələr yaranıb.

Husi hərəkatının hərbi nümayəndəsi Yəhya Səriya bəyan edib ki, bu əməliyyatlar Səudiyyə Koalisiyasının Yəmən ərazilərinə və paytaxt Sənaya endirdiyi hava zərbələrinə cavab xarakteri daşıyır.