Xocavənd Şəhəri Günündə atəşfəşanlıq olub- VİDEO

20 Sentyabr – Xocavənd Şəhəri Günü münasibətilə Xocavənd şəhərində genişmiqyaslı ictimai-mədəni tədbirlər və konsert proqramı keçirilib.

hadiseler.info xəbər verir ki, tədbir Ağdam, Füzuli və Xocavənd rayonlarında Azərbaycan Respublikası Prezidentinin Xüsusi Nümayəndəliyi və Mədəniyyət Nazirliyinin birgə təşkilatçılığı ilə baş tutub. Tədbirin keçirilməsində əsas məqsəd Xocavəndin işğaldan azad olunmasını, Azərbaycanın ərazi bütövlüyünü və tam suverenliyini qeyd etmək, zəfər tarixini yaşatmaqdır.

Tədbir Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayıb. Konsertdən öncə çıxış edən Azərbaycan Prezidentinin xüsusi nümayəndəsi Emin Hüseynov sakinləri təbrik edərək, şəhər gününün ilk dəfə qeyd olunduğunu və bir il əvvəl başlayan Böyük Qayıdış prosesinin ardıcıl davam etdiyini vurğulayıb.

Mədəniyyət proqramında Rəşid Behbudov adına Azərbaycan Dövlət Mahnı Teatrının solistləri və tanınmış incəsənət nümayəndələri müxtəlif musiqi və bədii nömrələrlə çıxış ediblər. Günün sonunda isə bayram ovqatını yüksəldən təntənəli atəşfəşanlıq təşkil olunub.