IFC “Bank Respublika”da uzunmüddətli investor olacaq  

Beynəlxalq Maliyyə Korporasiyası (IFC) “Bank Respublika” ASC və “AccessBank” QSC-nin birləşməsi üzrə əqd yekunlaşdıqdan sonra da öz iştirakını və dəstəyini sürdürəcəyini bəyan edib.

hadiseler.info “Report”a istinadən xəbər verir ki, IFC bu əqdin Azərbaycanda kiçik biznes subyektlərinin və maliyyə xidmətlərindən kənarda qalan əhali qruplarının imkanlarını genişləndirəcəyini, özəl sektorun inkişafı və yeni iş yerlərinin yaradılmasına təkan verəcəyini bildirib.

Nəzərdə tutulan strateji əqd çərçivəsində “AccessBank”ın mövcud səhmdarları “Bank Respublika”nın nizamnamə kapitalının 25%-ni təşkil edəcək yeni imtiyazlı səhmləri alacaqlar. Əqdin 2026-cı ilin noyabr ayına qədər tamamlanması gözlənilir.  

Hazırda IFC “AccessBank”da 16,56 % paya sahibdir. “AccessBank”ın digər əsas beynəlxalq səhmdarları sırasında Asiya İnkişaf Bankı (19,9 %), Avropa İnvestisiya Bankı (17,39 %), “responsAbility” (12,28 %), Niderland İnkişaf Bankı FMO (9,41 %) və digərləri yer alır. “Bank Respublika”nın nəzarət paketi (63,32 %) isə Natiq Quliyevə məxsusdur.