Hindistanda meymun hücumu faciə ilə bitdi — VİDEO

Hindistanın Karnataka ştatında dəhşətli hadisə qeydə alınıb.

hadiseler.info “NDTV”yə istinadən verdiyi məlumata görə, Koppal şəhərində tanınmış yazıçı M.S.Savadattinin 91 yaşlı həyat yoldaşı Nəcəmunnisa Bəyim evinin həyətində gəzərkən meymunun hücumuna məruz qalıb.

Heyvanın qəfil üzərinə atılması nəticəsində yıxılan qadının köməyinə qızı tələssə də, o da meymunun hücumuna tuş gəlib. Xəstəxanaya yerləşdirilən 91 yaşlı qadının səhhətində əvvəlcə müsbət dinamika müşahidə edilsə də, ertəsi gün vəziyyəti kəskin pisləşib. Ürəyi dayanan qadını reanimasiya tədbirlərinə baxmayaraq xilas etmək mümkün olmayıb.

Qeyd edək ki, bu, sözügedən regionda sentyabr ayı ərzində meymun hücumu nəticəsində qeydə alınan üçüncü ölüm faktıdır.