Azərbaycan və Zimbabve arasında siyasi məsləhətləşmələr haqqında memorandum imzalanıb

Azərbaycan Respublikası ilə Zimbabve Respublikası arasında siyasi dialoqun genişləndirilməsi istiqamətində mühüm sənəd imzalanıb.

hadiseler.info xəbər verir ki, BMT Baş Assambleyasının 81-ci sessiyası çərçivəsində Azərbaycanın xarici işlər naziri Ceyhun Bayramov Zimbabvenin xarici işlər və beynəlxalq ticarət naziri Amon Murvira ilə görüşüb.

Azərbaycan Xarici İşlər Nazirliyinin məlumatına görə, nazirlər ikitərəfli gündəliyi, siyasi dialoqun inkişaf perspektivlərini və çoxtərəfli platformalarda qarşılıqlı dəstək məsələlərini müzakirə ediblər. Görüşdə Ceyhun Bayramov Zimbabvenin 2027–2028-ci illər üçün BMT Təhlükəsizlik Şurasının qeyri-daimi üzvü seçilməsi münasibətilə təbriklərini çatdırıb və Azərbaycanın sıx əməkdaşlığa hazır olduğunu bildirib.

Görüşün sonunda xarici işlər nazirləri “Azərbaycan Respublikasının Xarici İşlər Nazirliyi ilə Zimbabve Respublikasının Xarici İşlər və Beynəlxalq Ticarət Nazirliyi arasında siyasi məsləhətləşmələr haqqında Anlaşma Memorandumu”nu imzalayıblar.