Mark Zukerberq bir gündə 10,9 milyard dollar itirib

“Meta” şirkətinin səhmlərinin birjada kəskin ucuzlaşması fonunda qurucu Mark Zukerberqin şəxsi sərvəti sentyabrın 28-də 10,9 milyard dollar azalıb.

hadiseler.info xəbər verir ki, “Forbes” jurnalının “Real-Time Billionaires” siyahısındakı yenilənməyə əsasən, Zukerberqin kapitalı 4,23% geriləyərək 246,7 milyard dollara düşüb və beləliklə, 250 milyard dollar həddindən aşağı enib.

Bu, milyarderin son günlərdə qarşılaşdığı ikinci böyük itkidir. Sentyabrın 25-də də 8,9 milyard dollar itirən Zukerberqin iki günlük ümumi zərəri təxminən 20 milyard dollara çatıb.

Səhmlərin ucuzlaşmasına “Meta”nın “MongoDB” şirkətinin baş direktoru Çirantan “CJ” Desainin baş korporativ platforma direktoru vəzifəsinə təyinatı ilə bağlı elanı səbəb olub. Desai şirkətin süni intellekt modelləri, agentləri, kodlaşdırma alətləri və API-lərinin biznes sektoruna satışını əhatə edən yeni istiqamətə rəhbərlik edəcək. Bu xəbərdən sonra “Meta”nın səhmləri 4%-dən çox ucuzlaşaraq 719,44 dollara, “MongoDB”nin səhmləri isə 18%-dən çox düşərək 334,53 dollara geriləyib.

Qeyd olunur ki, “Meta”nın 2026-cı il üçün nəzərdə tutulan kapital xərclərinin 145 milyard dollara qədər olacağı gözlənilir.