Qaxda faciəvi qəza: 1 ölü – VİDEO

Qax rayonunda bir nəfərin ölümü, dörd nəfərin isə yaralanması ilə nəticələnən ağır yol-nəqliyyat hadisəsi baş verib.

hadiseler.info xəbər verir ki, dəhşətli qəza oktyabrın 6-da gecə saat 02:45 radələrində Qax şəhəri ərazisində qeydə alınıb.

Şəhər sakini, 18 yaşlı Kamran Məmmədov sürücülük hüququ və etibarnamə olmadan idarə etdiyi “Opel” markalı avtomobillə yüksək sürətlə hərəkətdə olarkən idarəetməni itirib. Anidən yoldan çıxan avtomobil əvvəlcə işıq dirəyinə, daha sonra qarşı hərəkət zolağına keçərək yaşayış evinin divarına çırpılıb.

Qəza nəticəsində avtomobildə olan sərnişin – 17 yaşlı Elcan Muxtarov aldığı ağır xəsarətlərdən hadisə yerindəcə həyatını itirib. Maşında olan digər sərnişinlər – 16 yaşlı Ziyad Şahməliyev, 18 yaşlı Mürsəl Muxtarov, 20 yaşlı Şahmalı Abdulətif və 18 yaşlı Ərhan Əlizadə müxtəlif dərəcəli bədən xəsarətləri alıblar.

Faktla bağlı cinayət işi başlanılıb, araşdırma aparılır.

Hadisə ilə bağlı Baş Dövlət Yol Polisi İdarəsi (BDYPİ) valideynlərə və sürücülərə müraciət edərək xəbərdarlıq edib. Yol polisi bildirib ki, sürücülük hüququ olmadan avtomobil idarə edilməsi, sürət həddinin aşılması və diqqətsizlik sağalmaz faciələrə yol açır. BDYPİ gəncin həyatına son qoyan bu hadisədən hər kəsi düzgün nəticə çıxarmağa, sürücülük hüququ olmayan şəxslərə avtomobil etibar etməməyə çağırıb.