Şahbaz Şərif İlham Əliyevə zəng etdi

Pakistan İslam Respublikasının Baş naziri Məhəmməd Şahbaz Şərif Azərbaycan Respublikasının Prezidenti İlham Əliyevə telefonla zəng edib.

hadiseler.info xəbər verir ki, telefon danışığı zamanı iki ölkə arasında mövcud olan dostluq, qardaşlıq və strateji tərəfdaşlıq münasibətlərinin inkişafından böyük məmnunluq ifadə olunub. Yüksək səviyyəli mütəmadi görüşlərin və məsləhətləşmələrin ikitərəfli əlaqələrin daha da möhkəmlənməsindəki xüsusi rolu vurğulanıb.

Söhbət əsnasında siyasi sahədəki yüksəksəviyyəli münasibətlərin iqtisadi, ticari və investisiya sahələrində də genişləndirilməsinin vacibliyi diqqətə çatdırılıb. Baş nazir Şahbaz Şərif Pakistan xalqının Prezident İlham Əliyevə və Azərbaycan xalqına böyük hörmət və ehtiram bəslədiyini bir daha ifadə edib.

“ASAN xidmət” təcrübəsi Pakistanda genişləndirilir:

Telefon danışığında xüsusi vurğulanan məqamlardan biri də Azərbaycanın innovativ idarəetmə brendi olan “ASAN xidmət” modeli olub. Pakistanın Baş naziri Azərbaycanın dəstəyi ilə İslamabadda yaradılmış xidmət mərkəzinin fəaliyyətindən məmnunluğunu bildirərək, bu uğurlu təcrübənin Pakistanın digər bölgələrində də tətbiq olunması üçün rəsmi Bakının dəstək göstərməsini xahiş edib. Prezident İlham Əliyev bu istiqamətdə lazımi dəstəyin verilməsinə razılıq ifadə edib. Şahbaz Şərif bu addımı ölkələrimiz arasındakı dostluq və həmrəyliyin növbəti bariz nümunəsi kimi qiymətləndirərək dövlət başçısına təşəkkürünü bildirib.

Danışıq zamanı, həmçinin Pakistanın regional və beynəlxalq səviyyədə dialoqun təşviqi, vasitəçilik və gərginliyin azaldılması istiqamətindəki diplomatik səyləri təqdir olunub, ikitərəfli və çoxtərəfli gündəlikdə duran digər məsələlər ətrafında fikir mübadiləsi aparılıb.