Milli Məclisin işçi qrupu: Azərbaycan–Türkiyə münasibətləri siyasi məsuliyyət tələb edir

Milli Məclisin Azərbaycan–Türkiyə parlamentlərarası əlaqələr üzrə işçi qrupu Türkiyənin bəzi media orqanlarında və sosial şəbəkələrdə Azərbaycana qarşı aparılan qərəzli kampaniyalarla bağlı bəyanat yayıb.

hadiseler.info “Report”a istinadən xəbər verir ki, bəyanatda hakim Ədalət və İnkişaf Partiyasının (AK Parti) bəzi deputatları və Türkiyə Prezidentinin baş müşaviri Oktay Saral tərəfindən ölkəmizlə bağlı səsləndirilən əsassız ittihamların ciddi narahatlıq və təəssüf doğurduğu vurğulanıb.

Bəyanatda qeyd olunub ki, Ulu Öndər Heydər Əliyevin “Bir millət, iki dövlət” prinsipi iki müstəqil və suveren dövlətin varlığını nəzərdə tutur və bu formuldan daxili işlərə müdaxilə və ya kənar ideologiyaları diktə etmək üçün istifadə olunması qəbuledilməzdir. Azərbaycanın dünyəvi dövlət quruluşuna, təhsil siyasətinə, eləcə də ölkə rəhbərliyinə və xalqına qarşı işlədilən təhqiramiz ifadələrin haqlı narazılıq doğurduğu, AK Parti iqtidarının bu təxribatların qarşısını almaq üçün addım atmamasının və diplomatik korpusların qarşısındakı aksiyalara göz yummasının suallar yaratdığı diqqətə çatdırılıb.

İşçi qrupu Türkiyənin siyasi dairələrini və parlament təmsilçilərini Azərbaycanın suverenliyinə hörmətlə yanaşmağa və müttəfiqlik münasibətlərinə xələl gətirə biləcək bəyanatlardan çəkinməyə çağırıb.