Türkiyədə irimiqyaslı narkotik əməliyyatı: 31 nəfər saxlanıldı

Türkiyənin Ankara Respublika Baş Prokurorluğunun yürütdüyü narkotik istintaqı çərçivəsində keçirilən xüsusi əməliyyat nəticəsində 31 şübhəli şəxs gözaltına alınıb.

hadiseler.info “TRT Haber”ə istinadən xəbər verir ki, Əyalət Jandarma Komandanlığı və Narkotik Cinayətlərlə Mübarizə Şöbəsinin birgə tədbirləri ilə 33 nəfərin qanunsuz narkotik ticarəti, saxlanılması və qanunsuz silah gəzdirmə cinayətlərini törətdiyi müəyyən edilib. Prokurorluğun qərarı ilə Ankaranın 14 rayonunda eyni vaxtda əməliyyat həyata keçirilib.

Keçirilən əməliyyat zamanı 31 şübhəli saxlanılıb, qalan 2 nəfərin tutulması istiqamətində axtarışlar davam etdirilir. Axtarışlar zamanı müxtəlif növ külli miqdarda narkotik vasitələr (marixuana, skank, sintetik həblər, kokain və s.), 5 dəqiq tərəzi, 3 qanunsuz tapança, 3 ov tüfəngi və cinayət yolu ilə əldə edildiyi ehtimal olunan 25 min 700 lirə nağd pul müsadirə olunub.