Sankt-Peterburqda meymunçiçəyi şübhəsi ilə beş nəfər xəstəxanaya yerləşdirildi

Rusiya Federasiyasının Sankt-Peterburq şəhərində meymunçiçəyinə (Mpox) yoluxma şübhəsi ilə beş nəfər təcili olaraq xəstəxanaya yerləşdirilib və həkim nəzarətinə götürülüb.

hadiseler.info xəbər verir ki, bu barədə “Rospotrebnadzor”un Sankt-Peterburq və Leninqrad vilayəti üzrə İdarəsi məlumat yayıb.

Rəsmi açıqlamada deyilir:

“Epidemioloji araşdırma çərçivəsində təmasda olan şəxslərin müəyyən edilməsi istiqamətində işlər aparılır. Beş nəfər xəstəxanaya yerləşdirilib və tibbi müşahidə altındadır. Dezinfeksiya tədbirlərinin keçirilməsi üçün müvafiq göstəriş verilib”.

Xatırladaq ki, bir gün əvvəl Moskva vilayətində də meymunçiçəyinə yoluxduğu ehtimal edilən şəxslə təmasda olmuş daha beş nəfər profilaktik məqsədlə xəstəxanaya yerləşdirilmişdi.

Regionun Səhiyyə Nazirliyinin məlumatına görə, həmin şəxslərdə xəstəliyin simptomları müşahidə olunmayıb, vəziyyətləri qənaətbəxş qiymətləndirilib. Onlardan müvafiq laborator analizlər götürülərək tibbi müşahidə müəyyən olunub.