İtaliyada da etiraz dalğası başlayıb- VİDEO

Avropanı bürüyən sosial-iqtisadi etiraz dalğası İtaliyaya da keçib. Ölkədə qiymətlərin kəskin artması və sosial problemlər fonunda kütləvi aksiyalar keçirilib.

hadiseler.info xəbər verir ki, nümayişlər zamanı etirazçılarla polis qüvvələri arasında şiddətli toqquşmalar baş verib. Bu barədə “Mash” “Telegram” kanalı məlumat yayıb.

Məlumata əsasən, xüsusilə Milan və Bolonya şəhərlərində etirazçılar hüquq-mühafizə organları ilə sert qarşıdurmaya giriblər. İğtişaşlar nəticəsində azı 60 nəfər müxtəlif dərəcəli bədən xəsarəti alıb.

Mənbədə bildirilir ki, Milanda radikal qruplar polis əməkdaşlarına daş və petardalar atıb, barrikadaları atəşə verib və ticarət obyektlərinin vitrinlərini sındırıblar. Polis aksiyaçıları dağıtmaq üçün gözyaşardıcı qaz və su şırnaqlarından istifadə edib. Şəhərin populyar ticarət mərkəzində və mərkəzi küçələrində güclü partlayış səsləri eşidilib.

Nümayişçilər yaşayış dəyərinin kəskin artmasına, yüksək vergi yükünə, aşağı əməkhaqlarına və dövlət xidmətlərindəki mövcud böhrana kəskin etirazlarını bildirirlər.

Hadisələrlə əlaqədar olaraq ölkə üzrə ümumilikdə 70-ə yaxın insan saxlanılıb. Onlardan təxminən 50 nəfəri Milanda nəzarətə götürülüb, daha 19 nəfər isə Turin və Bolonyada saxlanılıb.

Qeyd edək ki, oxşar kütləvi etiraz və iğtişaş dalğası hazırda Fransanı da bürüyüb.