Azərbaycanlı gənc Oksford Universitetinin müəllimi oldu

Dövlət Proqramı təqaüdçüsü Nuranə Məmmədova dünyanın ən nüfuzlu ali təhsil ocaqlarından olan Oksford Universitetində müəllim kimi fəaliyyətə başlayıb.

hadiseler.info Elm və Təhsil Nazirliyinə istinadən xəbər verir ki, Beynəlxalq münasibətlər ixtisası üzrə doktorantura təhsilinin ikinci ilində olan təqaüdçü təhsilini davam etdirməklə yanaşı, Oksford Universitetinin “Qlobal idarəetmə və diplomatiya” magistratura proqramının müəllim heyətinə daxil edilib. O, bu proqram çərçivəsində təməl fənlərin tədrisində və magistrantların akademik hazırlığında iştirak edəcək.

Nuranə Məmmədova eyni zamanda Oksford Universitetində üzvü olduğu kollecin köməkçi dekan (Junior Dean) vəzifəsinə seçilib. Bu vəzifə tələbələrin rifahının təmin olunması, akademik icmanın dəstəklənməsi və kollec həyatının idarə olunması kimi məsuliyyətli öhdəlikləri əhatə edir. Qeyd edək ki, N.Məmmədova magistratura təhsilini də Dövlət Proqramı çərçivəsində “Diplomatik tədqiqatlar” ixtisası üzrə Oksford Universitetində başa vurub.