Gürcüstan Bakı-Tbilisi-Bakı marşrutu üzrə əlavə qatar qəbul etməyə hazır deyil 

Nəqliyyat sahəsi üzrə ekspert Eldəniz Cəfərov sosial şəbəkə hesabında Bakı-Tbilisi-Bakı istiqaməti üzrə marşrutla bağlı diqqətçəkən məlumat paylaşıb:

“Azərbaycan Dəmir Yolları Bakı-Tbilisi-Bakı marşrutu üzrə əlavə reys təşkil edib və bunun üçün qatar da hazırdır. Ancaq Gürcüstan tərəfi bu qatarı qəbul etməyə hazır deyil. Gürcüstan tərəfində bəzi texniki çətinliklər var. Belə ki, qatarların stansiyada manevr və digər hərəkətləri zamanı elektrik təchizatının təmin olunması ilə bağlı problemlər mövcuddur. Bundan başqa, Gürcüstan sərhəd xidməti də əlavə reys üzrə yoxlamaları həyata keçirməyə hələ hazır deyil”.

Mütəxəssis qeyd edib ki, son zamanlar qonşu ölkə ərazisində reallaşdırılan sərhəd nəzarəti prosedurları müəyyən edilmiş vaxt çərçivəsini aşaraq daha uzun çəkir:
“Elektrik təchizatı ilə bağlı yaranan problemlər də Bakı-Tbilisi-Bakı qatarının gecikməsi ilə nəticələnir. Azərbaycan tərəfi əlavə qatarı artıq hazırlayıb, lakin Gürcüstan tərəfi həmin əlavə reysi qəbul etməyə hazır deyil”.

Məlumat üçün bildirək ki, iki ölkə arasındakı sərnişin qatarının fəaliyyəti koronavirus pandemiyasına görə 2020-ci ilin yazında dayandırılmışdı. 6 illik fasiləyə yekun vurularaq marşrut üzrə hərəkət 2026-cı il mayın 26-da yenidən bərpa edilib.  

Xatırladaq ki, son günlərdə Gürcüstanın enerji sistemində meydana gələn kütləvi fasilələr Bakı-Tbilisi istiqamətində hərəkət edən qatarların cədvəlinə də mənfi təsir göstərib və dənizyanı marşrut boyu dəmir yolu nəqliyyatında gecikmələrə şərait yaradıb.