İndoneziyada alov fəlakəti: Meşə yanğını Bromo milli parkını bağlatdı

İndoneziyanın Şərqi Yava əyalətində yerləşən Bromo dağı milli parkı davam edən meşə yanğını səbəbindən bütün növ turizm fəaliyyətləri üçün müddətsiz olaraq bağlanıb. Bu barədə park administrasiyası rəsmi səhifəsində bəyanat yayıb.  

Alovun əhatə etdiyi sahə qısa müddətdə genişlənərək 176 hektara çatıb. Həftənin əvvəlində fəaliyyətdə olan Bromo vulkanı ərazisində başlayan yanğının sahəsi cümə axşamı təxminən 60 hektar təşkil edirdisə, havanın quraq keçməsi və külək səbəbindən alov sürətlə yayılıb.  

Səlahiyyətlilər bildiriblər ki, bu qərar turistlərin, park əməkdaşlarının və ətraf yaşayış məntəqələrindəki sakinlərin təhlükəsizliyini təmin etmək üçün qəbul edilib. Bilet almış şəxslərin səfərlərini başqa tarixə keçirmələrinə və ya ödənilən vəsaiti geri almalarına şərait yaradılacaq.  

Yanğının söndürülməsi üçün əraziyə xüsusi avadanlıqlar, o cümlədən helikopterlər və dronlar cəlb olunub. Hadisə nəticəsində xəsarət alanlar barədə məlumat daxil olmayıb və yanğının çıxma səbəbləri araşdırılır.  

Quraqlıq və yanğın riski artır

Bölgədə müşahidə olunan anomal quraq hava şəraiti söndürmə işlərini çətinləşdirir. Səlahiyyətli qurumlar milli park ərazisində təhlükəsizlik tədbirlərini gücləndirib.