“Əcəmi seyrangahı” istirahət kompleksində memar Əcəmi Naxçıvaninin abidəsi açılıb – FOTOLAR

Avqustun 11-də Azərbaycan Respublikasının Prezidenti İlham Əliyev və birinci xanım Mehriban Əliyeva Naxçıvan şəhərindəki “Əcəmi seyrangahı” istirahət kompleksində memar Əcəmi Naxçıvaninin abidəsinin açılışında iştirak ediblər.

hadiseler.info xəbər verir ki, abidənin müəlliflərindən biri Xalq rəssamı Salxab Məmmədov dövlət başçısına və birinci xanıma heykəltəraşlıq əsəri barədə məlumat verib.

Azərbaycan memarlığının görkəmli nümayəndəsi, Naxçıvan memarlıq məktəbinin banisi Əcəmi Naxçıvaninin anadan olmasının bu il 900 illiyi tamam olur. Prezident İlham Əliyev dahi memarın yubileyinin qeyd edilməsi və abidəsinin ucaldılması barədə müvafiq Sərəncam imzalayıb.

Xalq rəssamları Salxab Məmmədov, Əli İbadullayev və Naxçıvan Muxtar Respublikası Memarlar Birliyinin sədri Heydər Əhmədovun müəllifi olduğu bürünc heykəlin hündürlüyü postamentlə birgə 385 santimetrdir. Qranit postament üzərində ucaldılan abidənin ətrafında abadlıq işləri aparılıb, müasir rekreasiya zonası yaradılıb. Qeyd edək ki, Əcəmi Naxçıvaninin 900 illik yubileyi UNESCO-nun yubileylər siyahısına daxil edilib.