Naxçıvanda külli miqdarda saxta aksizli içki aşkarlandı

Naxçıvan Muxtar Respublikasının İqtisadiyyat Nazirliyi yanında Dövlət Vergi Xidməti (DVX) tərəfindən aksizli məhsulların dövriyyəsinə nəzarətin gücləndirilməsi və şəffaflığın təmin edilməsi istiqamətində növbəti operativ nəzarət tədbiri keçirilib.

hadiseler.info xəbər verir ki, Vergi Cinayətlərinin İbtidai Araşdırılması İdarəsinin əməkdaşları tərəfindən Kəngərli rayonunun Qarabağlar kəndində yerləşən anbarda yoxlama aparılıb.

Həyata keçirilən reyd zamanı vətəndaş Murtuzayev Sahil Arif oğluna məxsus anbarda satış məqsədilə saxlanılan külli miqdarda saxta aksiz markası ilə markalanmış alkoqollu içkilər aşkar olunub. Müvafiq sənədləşmə işləri aparıldıqdan sonra qanunsuz məhsullar müsadirə edilərək götürülüb. Hazırda faktla bağlı Dövlət Vergi Xidməti tərəfindən hər tərəfli araşdırmalar davam etdirilir.

Dövlət Vergi Xidməti bir daha bütün sahibkarlıq subyektlərinə müraciət edərək qanunvericiliyin tələblərinə ciddi eməl etməyə çağırır. Bildirilib ki, bu tür nəzarət tədbirləri marketlərdə və anbarlarda sağlam rəqabət mühitinin qorunması, “kölgə iqtisadiyyatı”nın qarşısının alınması məqsədilə bundan sonra da davamlı şəkildə həyata keçiriləcək.