Prezident Böyük Britaniyanın yeni səfirini qəbul etdi

Azərbaycan Prezidenti İlham Əliyev Böyük Britaniya və Şimali İrlandiya Birləşmiş Krallığının ölkəmizdə yeni təyin olunmuş fövqəladə və səlahiyyətli səfiri Dankan Normanı qəbul edib.

hadiseler.info xəbər verir ki, səfir etimadnaməsini dövlət başçısına təqdim edib. Görüşdə çıxışına Azərbaycan dilində başlayan Dankan Norman iki ölkə arasında yeni strateji tərəfdaşlığın inkişaf etdirilməsi, bərpaolunan enerji, müdafiə, aviasiya və təhsil sahələrində əməkdaşlığın genişləndirilməsi prioriteti barədə danışıb. Səfir, həmçinin ölkəsinin Azərbaycanın minatəmizləmə səylərini və Ermənistanla sülh prosesini dəstəklədiyini vurğulayıb.

Prezident İlham Əliyev diplomata fəaliyyətində uğurlar arzulayaraq onun Azərbaycan dilində çıxışını yüksək qiymətləndirib. Dövlət başçısı minatəmizləmə sahəsindəki dəstəyə görə təşəkkürünü bildirib, bərpaolunan enerji üzrə bp ilə birgə layihələri, regionda təhlükəsizlik məsələlərini və ölkəmizdəki müsbət investisiya mühitini diqqətə çatdırıb.