Bakıda yolda təhlükəli hərəkətlər edən azyaşlılar valideynləri ilə polisə çağırıldı-VİDEO

Paytaxtın Xətai rayonu, 8 Noyabr prospektində nəqliyyatın sıx olduğu saatlarda iki yeniyetmənin yola çıxaraq təhlükəli hərəkətlər etməsi sosial şəbəkələrdə kəskin etirazla qarşılanıb.

hadiseler.info xəbər verir ki, avtomobil yolunda qaçaraq gimnastika hərəkətləri edən azyaşlıların görüntüləri sosial şəbəkələrdə yayıldıqdan sonra Daxili İşlər Nazirliyi (DİN) məsələyə dərhal reaksiya verib.

DİN-in Mətbuat xidmətindən bildirilib ki, həm özlərinin, həm də digər sürücü və piyadaların həyatını riskə atan yeniyetmələrin şəxsiyyəti polis əməkdaşları tərəfindən müəyyən olunub.

Hər iki azyaşlı valideynləri ilə birgə Xətai Rayon Polis İdarəsinə dəvət edilib. Onlarla profilaktik və maarifləndirici söhbətlər aparılıb, yol hərəkəti təhlükəsizliyi qaydalarına əməl etməyin vacibliyi xatırladılıb. Valideynlərə isə övladlarının davranışlarına nəzarəti artırmaq barədə xəbərdarlıq edilib.