Formula 1 yarışına gələnlərə viza güzəşti – Prezidentdən SƏRƏNCAM

Prezident İlham Əliyev 2026-cı ildə Bakıda keçiriləcək Formula 1 yarışları ilə əlaqədar Azərbaycana gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında sərəncam imzalayıb.

hadiseler.info xəbər verir ki, sərəncama əsasən, yarışla bağlı ölkəyə gələn şəxslər 2026-cı il 25 avqust – 30 sentyabr tarixlərində Azərbaycanın beynəlxalq hava limanlarında viza ala biləcəklər.

Beynəlxalq hava limanlarında viza verilıməsi üçün aşağıdakı sənədlərdən biri əsas hesab ediləcək:

 FIA və ya Formula One Management Limited qaydalarına uyğun akkreditasiyanı təsdiq edən sənəd;

 Bakı Şəhər Halqası Əməliyyat Şirkətində akkreditasiyadan keçməni təsdiqləyən kart;

 2026 Bakı Formula 1 yarışına bilet (və ya elektron bilet/biletin əldə olunmasını təsdiq edən sənəd).

Sərəncamla Xarici İşlər Nazirliyinə beynəlxalq qurumları və xarici tərəfdaşları viza güzəştləri barədə məlumatlandırmaq, habelə səfirlik və konsulluqların saytlarında “ASAN Viza” imkanlarını işıqlandırmaq tapşırılıb. Dövlət Miqrasiya Xidməti isə ölkəyə uçuşlar edən aviaşirkətləri müvafiq qaydada məlumatlandıracaq.