Ağdamın Abdal kəndində genişmiqyaslı yanğın: 30 hektar sahə yanır-VİDEO

Ağdam rayonu ərazisində genişmiqyaslı yanğın hadisəsi qeydə alınıb.

hadiseler.info xəbər verir ki, yanğın rayonun Abdal kəndi yaxınlığındakı açıq sahədə başlayıb. İlkin məlumatlara görə, alov qısa müddətdə yayılaraq təxminən 30 hektar ərazini bürüyüb.

Hadisə yerinə dərhal Fövqəladə Hallar Nazirliyinin (FHN) Ağdam Yanğından Mühafizə Hissəsinin 2 texnikası və Xocalı rayonundan 1 yanğınsöndürən avtomobil, eləcə də şəxsi heyət cəlb olunub.

Yanğının baş verdiyi sahənin hələ minadan təmizlənmədiyi bildirilir. Bu təhlükəli amil yanğınsöndürənlərin əraziyə birbaşa daxil olaraq alovun qarşısını almasını ciddi şəkildə çətinləşdirir.

Hazırda yanğının ətraf ərazilərə yayılmaması və söndürülməsi istiqamətində FHN qüvvələri tərəfindən tədbirlər davam etdirilir.