Azərbaycanda bir sıra dövlət qurumlarının saytlarına kiberhücum olub

Azərbaycanın dövlət informasiya infrastrukturlarına və bir sıra qurumların rəsmi internet ehtiyatlarına qarşı intensiv kiberhücumlar qeydə alınıb.

hadiseler.info xəbər verir ki, Xüsusi Rabitə və İnformasiya Təhlükəsizliyi Dövlət Xidmətindən bildirilib ki, oktyabrın 13-də saat 22:00-dan etibarən xarici haker qruplaşması tərəfindən ölkəmizin dövlət informasiya infrastrukturlarına qarşı kiberhücum fəaliyyətləri həyata keçirilib. Hücum zamanı 100-dən artıq dövlət domeni hədəfə alınıb.

Kiberhücum nəticəsində Nazirlər Kabineti, Fövqəladə Hallar Nazirliyi, Daxili İşlər Nazirliyi, Dövlət İmtahan Mərkəzi, Səhiyyə Nazirliyi və digər dövlət qurumlarının rəsmi internet resurslarının fəaliyyətində fasilələr yaranıb.

Xidmətin əməkdaşları tərəfindən görülmüş operativ texniki tədbirlər sayəsində kiberhücumun təsirləri məhdudlaşdırılıb və saytların fəaliyyətinin bərpası istiqamətində işlər həyata keçirilib. Hazırda kibertəhlükəsizliyin gücləndirilməsi məqsədilə zəruri tədbirlər davam etdirilir.