Bakıda 5 marşrut xətti “brutto müqavilə” sisteminə keçdi

Bakıda müntəzəm sərnişindaşımada göstərilən xidmət keyfiyyətinin və effektivliyin artırılması məqsədilə “brutto müqavilə” modelinin tətbiqinə start verilib.

hadiseler.info xəbər verir ki, Azərbaycan Yerüstü Nəqliyyat Agentliyi (AYNA) tərəfindən tətbiq edilən yeni sistemə ilk olaraq 130, 205, 211, 500 və 503 nömrəli marşrut xətləri qoşulub.

Yeni modelə əsasən, daşıyıcılara ödənişlər sərnişin sayına görə deyil, qət edilən məsafəyə və xidmət keyfiyyətinə görə olunacaq. Bu sistem axşam saatlarında və azrentabelli şəhərətrafı marşrutlarda avtobusların intervallara tam riayət etməsini təmin edəcək. Həmçinin, xüsusi proqram təminatı ilə daşıyıcıların fəaliyyətinə nəzarət olunacaq və tələblər pozulduqda maliyyə sanksiyaları tətbiq ediləcək. Yeni model avtobus parkının yenilənməsinə və ekoloji təmiz nəqliyyat vasitələrinin cəlb olunmasına da zəmin yaradacaq.