Bakıda köşk yandı,1 nəfər həlak oldu

Bakının Xətai rayonunda ərzaq satışı köşkündə ölüm xəsarəti ilə nəticələnən yanğın hadisəsi baş verib.

hadiseler.info xəbər verir ki, hadisə Əhmədli qəsəbəsi ərazisində yerləşən ərzaq köşkündə qeydə alınıb. Fövqəladə Hallar Nazirliyinin (FHN) Mətbuat xidmətinin verdiyi məlumata görə, dərhal əraziyə FHN-in Dövlət Yanğından Mühafizə Xidmətinin qüvvələri cəlb olunub.

Yanğınsöndürənlərin operativ müdaxiləsi sayəsində alovun genişlənməsinə imkan verilmədən yanğın qısa müddətdə söndürülüb.

Həyata keçirilən kəşfiyyat-axtarış tədbirləri zamanı ümumi sahəsi 20 kv.m olan köşkün içərisində yataq dəstinin qismən yandığı müəyyən edilib. Hadisə yerində 1968-ci il təvəllüdlü Əliyev Ağayar Xanhüseyn oğlunun meyiti aşkar olunub.

Yanğınsöndürənlərin səyi nəticəsində köşkün qalan hissəsi yanğından mühafizə olunub. Hadisə ilə bağlı aidiyyəti qurumlar tərəfindən araşdırma aparılır.