Bakıda üzərinə monitor aşan qadının son vəziyyəti məlum oldu

Bakının Məhəmməd Naxçıvani küçəsində keçirilən kütləvi tədbir zamanı üzərinə iriölçülü LED ekran aşaraq ağır xəsarət alan 58 yaşlı qadının son durumu açıqlanıb.  

hadiseler.info “Bakıvaxtı.az”a istinadən xəbər verir ki, TƏBİB-dən verilən məlumata görə, 1968-ci il təvəllüdlü zərərçəkən sentyabrın 20-si saat 16:10 radələrində Kliniki Tibbi Mərkəzin Təcili tibbi yardım şöbəsinə hospitalizasiya olunub.

Bədənin müxtəlif nahiyələrinin müştərək travmaları diaqnozu təyin edilən pasiyentə təcili tibbi xidmətlər göstərilib. Daha sonra o, ailə üzvlərinin yazılı iltizamnaməsi əsasında həmin gün saat 18:20 radələrində özəl tibb müəssisəsinə təxliyə edilib.

Xatırladaq ki, bədbəxt hadisə Məhəmməd Naxçıvani (6-cı Paralel) küçəsində təşkil edilən tədbir zamanı baş verib. Hadisə zamanı təhlükəsizlik qaydalarının pozulması nəticəsində monitor aşaraq tədbir iştirakçısının ağır xəsarət almasına səbəb olmuşdu.