Binəqədidə yaşayış tikilisində yanğın: 36 yaşlı kişinin meyiti tapıldı-VİDEO

Bakının Binəqədi rayonunda bir neçə ailənin yaşadığı tikilidə baş verən yanğın zamanı 1 nəfər həyatını itirib.

hadiseler.info xəbər verir ki, Fövqəladə Hallar Nazirliyinin (FHN) “112” qaynar telefon xəttinə Əcəmi Naxçivani küçəsində yerləşən tikilidə yanğın olması barədə məlumat daxil olub. Dərhal əraziyə FHN-in Dövlət Yanğından Mühafizə Xidmətinin qüvvələri cəlb olunub.

Həyata keçirilən təxirəsalınmaz tədbirlər nəticəsində 700 kv.m ümumi sahəsi olan birmərtəbəli taxta tikilidə başlayan alovun genişlənməsinə imkan verilmədən qısa müddətdə söndürülüb. Yanğın nəticəsində tikilinin yanar konstruksiyaları 150 kv.m sahədə, bitişik yerləşən 100 kv.m-lik qarajın konstruksiyaları isə 10 kv.m sahədə yanıb.

Hadisə yerinin müayinəsi zamanı 1990-cı il təvəllüdlü Tapdıqov Fərid Əliyar oğlunun meyiti aşkarlanıb. Faktla bağlı müvafiq qurumlar tərəfindən araşdırma aparılır.