Gənclər arasında qorxunc trend: Üzlərinə çəkiclə vururlar- VİDEO

Dünyada gənclər arasında sosial şəbəkələrdə sürətlə yayılan və sağlamlığa ciddi təhlükə yaradan yeni və qeyri-adi trend müzakirələrə səbəb olub.

hadiseler.info “Mash”ın Telegram kanalına istinadən xəbər verir ki, üz cizgilərini daha kəskin və kişisayağı göstərmək məqsədi daşıyan “bonsməşinq” (bonesmashing) adlı təhlükəli üsul yayılıb. Bu trendin tərəfdarları yanaq və çənə sümüklərinə çəkiclə, yumruqla və ya ağır əşyalarla zərbələr endirərək üz quruluşlarını dəyişməyə çalışırlar.

Məlumata görə, bu üsula əl atanların əksəriyyəti 15-26 yaş arası gənclərdir, lakin bəzi hallarda 45 yaşadək kişilər də bu səbəbdən tibbi yardıma ehtiyac duyurlar. İştirakçılar endirilən zərbələrin sümük böyüməsini stimullaşdıracağına və üz cizgilərinə daha sərt, cəlbedici görünüş verəcəyinə inanırlar. Lakin həkimlər bu cür hərəkətlərin ağır nəticələrə gətirib çıxaracağını bildirirlər.

Artıq bu təhlükəli addımı atan gənclərdən birində qanaxma, digərində isə üzün bir hissəsində keyimə yaranıb. Mütəxəssislər xəbərdarlıq edirlər ki, güclü zərbələr sinirləri zədələyə, çənə və yanaq sümüklərinin sınmasına, göz xəsarətlərinə, eləcə də mimika əzələlərinin fəaliyyətinin pozulmasına səbəb ola bilər. Təkrarlanan travmalar birləşdirici toxumanın həddindən artıq artmasına – fibroza gətirib çıxarır ki, nəticədə üzdə sərtləşmiş nahiyələr, çapıqlar və qalıcı deformasiyalar meydana gəlir. Ağır hallarda cərrahi müdaxilə tələb olunur, hissiyyatın bərpası isə uzun müddət çəkir və ya ümumiyyətlə mümkün olmur.

Qeyd edək ki, “bonsməşinq” xarici görünüşü nəyin bahasına olursa-olsun ideal səviyyəyə çatdırmağı hədəfləyən “luksmaksinq” (looksmaxxing) subkulturası ilə əlaqələndirilir. Həkimlər gənclərə sağlamlıqlarını riskə atmamağı şiddətlə tövsiyə edirlər.