İrandan ABŞ-yə nüvəsiz silah cavabı: “Bombaların atası” təqdim olunacaq

İran ABŞ-nin hərbi hədələrinə cavab olaraq “bombaların atası” adlandırılan yeni silah növünü nümayiş etdirməyə hazırlaşır.

hadiseler.info xəbər verir ki, bu barədə İranın İslam İnqilabı Keşikçiləri Korpusunun (SEPAH) nümayəndəsi Hüseyn Möhəbbi yerli SNNTV telekanalına müsahibəsində məlumat verib.

Hüseyn Möhəbbi müsahibəsində vurğulayıb ki, təqdim ediləcək yeni hərbi vasitə düşmən üçün tamamilə gözlənilməz və yeni bir silah olacaq. Lakin SEPAH rəsmisi hazırlanmış silahın texniki göstəriciləri və fəaliyyət prinsipi barədə detallı məlumat verməkdən imtina edib.

Xatırladaq ki, bir neçə gün əvvəl CNN telekanalı ABŞ-nin İrana qarşı öz arsenalında olan ən güclü qeyri-nüvə aviasiya bombasından istifadə edə biləcəyi barədə xəbər yaymışdı. Söhbət çəkisi 9,8 ton təşkil edən və hərbi dairələrdə “bombaların anası” kimi tanınan GBU-43/B Massive Ordnance Air Blast (MOAB) ağır sursatından gedirdi. İranın bu addımı ABŞ-nin həmin anonsuna cavab həmləsi kimi qiymətləndirilir.