Moskvaya ən kütləvi PUA hücumu: Ölənlər və yaralananlar var — VİDEO

Rusiya paytaxtı Moskva və ətraf vilayətlər son dövrün ən kütləvi pilotsuz uçuş aparatı (PUA) hücumuna məruz qalıb.

hadiseler.info xəbər verir ki, bu barədə Moskva meri Sergey Sobyanin öz “Telegram” kanalında məlumat paylaşıb.

Merin sözlərinə görə, Hava Hücumundan Müdafiə (HHM) qüvvələri son sutka ərzində 1 600-dən çox PUA-nı zərərsizləşdirib. Onlardan 450-si birbaşa paytaxta yaxınlaşarkən vurulub.

Hücumlar nəticəsində Moskva Neft Emalı Zavodunun ərazisindəki obyektlərdən birinə ziyan dəyib. Şəhərin cənubunda, Orexov bulvarında yerləşən binaya dron çırpılıb. Moskva vilayətinin 17 dairəsi hücumdan təsirlənib. Hadisələr nəticəsində 2 nəfər həlak olub, daha 6 nəfər isə müxtəlif dərəcəli xəsarətlər alıb.

Təhlükəsizlik tədbirləri çərçivəsində Moskvanın Domodedovo, Vnukovo, Şeremetyevo və Jukovski hava limanları reyslərin qəbulunu və yola salınmasını dayandırıb. Eniş edə bilməyən 30-dan çox təyyarə digər şəhərlərin aeroportlarına yönləndirilib.