“Odissey” filmini pulsuz izləmək istəyənlərə xəbərdarlıq — “Lumma Stealer” təhlükəsi

Dünyaşöhrətli rejissor Kristofer Nolanın böyük maraqla qarşılanan “Odissey” (“The Odyssey”) filmi ilə bağlı yeni kibertəhlükə aşkarlanıb. Film hələ rəqəmsal platformalarda yayımlanmasa da, internetdə onun pirat nüsxələri adı altında yayılan saxta faylların istifadəçilərin kompüterlərinə məlumat oğurlayan zərərli proqram yüklədiyi müəyyənləşdirilib. Hadisələr.info xəbər verir ki, kibercinayətkarlar filmin görüntüsü altında “Lumma Stealer” proqramını yayırlar.

“Bitdefender” kibertəhlükəsizlik şirkətinin araşdırmasına görə, istifadəçilər artıq film faylı təsiri bağışlayan zərərli icra edilə bilən faylları yükləməyə başlayıblar. Hücumçular filmin qanuni video faylı olduğunu göstərən saxta yükləmə linkləri hazırlayırlar, istifadəçi faylı endirib açdıqda isə cihazına “Lumma Stealer” yüklənir. Şirkət “The Odyssey 2160pHD (2026) EngSubs EZTV.exe”, “The Odyssey 2026 1080p H264-DJT.exe” və “The Odyssey 2026 1080p WEBRip-LAMA.exe” kimi fayl adlarına qarşı diqqətli olmağı tövsiyə edir.

Çünki bunlar video faylları deyil, “Windows” sisteminin icra edilə bilən “.exe” fayllarıdır. Həmçinin faylın adında filmin keyfiyyəti və formatı ilə bağlı ifadələrin olması onun təhlükəsiz olduğu anlamına gəlmir.

Məlumata görə, “Lumma Stealer” cihazda saxlanılan brauzer şifrələrini, ödəniş və bank məlumatlarını, sessiya kukilərini, eləcə də mesajlaşma tətbiqləri və şəxsi sənədlərlə bağlı həssas məlumatları ələ keçirə bilər.

Lakin məşhur filmlərin adından istifadə etməklə zərərli proqram yayılması kiber aləmdə yeni üsul hesab edilmir.