Prezident İlham Əliyev ATƏT PA-nın prezidentini qəbul edib-FOTOLAR

Azərbaycan Respublikasının Prezidenti İlham Əliyev sentyabrın 3-də ATƏT Parlament Assambleyasının prezidenti Pere Joan Pons Sanpietronu qəbul edib.

hadiseler.info xəbər verir ki, qonaq regionda davamlı sülhün təmin edildiyini vurğulayaraq, Azərbaycanla Ermənistan arasında sülh gündəliyində qazanılmış nailiyyətlər münasibətilə dövlətimizin başçısını təbrik edib. Prezident İlham Əliyev təbriklərə görə təşəkkürünü bildirərək, 30 ilə yaxın müddətdə münaqişənin həllinə məsul olan ATƏT-in Minsk qrupunun heç bir nəticə əldə etmədiyini və BMT TŞ qətnamələrinin icra olunmadığını təəssüflə qeyd edib. Dövlət başçısı Azərbaycanın münaqişəyə hərbi-siyasi vasitələrlə son qoyaraq ərazi bütövlüyünü və suverenliyini özünün təmin etdiyini vurğulayıb.

Görüşdə Azərbaycanın ATƏT PA ilə təmaslarından və siyasi dialoqdan məmnunluq ifadə olunub, mədəniyyətlərarası dialoqda ölkəmizin rolu yüksək qiymətləndirilib. Sanpietro, həmçinin Bakıda keçirilən 4-cü Beynəlxalq Minatəmizləmə Konfransının əhəmiyyətinə toxunaraq, minalar probleminin ATƏT PA-nın gündəliyində də müzakirə edildiyini diqqətə çatdırıb.