Ramzan Kadırov Çeçenistan rəhbərliyinə namizəd kimi qeydə alındı

Çeçenistan Respublikasının hazırkı rəhbəri Ramzan Kadırov region rəhbəri vəzifəsinə keçiriləcək növbəti seçkilərdə rəsmən namizəd kimi qeydə alınıb.
Hadisələr.info xəbər verir ki, bu barədə respublikanın Seçki Komissiyası məlumat dərc edib.
Seçki Komissiyasının yaydığı bəyanatda bildirilir:
“Çeçenistan Respublikasının Seçki Komissiyası ‘Vahid Rusiya’ partiyasının Çeçenistan regional bölməsi tərəfindən namizədliyi irəli sürülmüş Ramzan Əhmədoviç Kadırovu respublika rəhbəri vəzifəsinə namizəd kimi qeydə alıb”.Kadırovun sentyabr ayında baş tutacaq seçkilərdə iştirak etmək üçün tələb edilən sənədlər toplusunu iyul ayında təqdim etdiyi diqqətə çatdırılıb.

Məlumat üçün bildirək ki, Kadırov ilk dəfə 2007-ci il aprelin 5-də Çeçenistan Prezidenti postuna yiyələnib. Sonuncu regional seçkilər 2021-ci ildə reallaşıb və rəsmi məlumatlara əsasən, səsverənlərin 99,7%-i onun namizədliyini dəstəkləyib. Növbəti seçkilərin keçirilməsi 20 sentyabr 2026-cı il tarixinə planlaşdırılır.

Xatırladaq ki, bir qədər əvvəl Kadırov seçkilərə “məcburiyyət qarşısında” qatıldığını ifadə etmişdi.