Sabahdan Bakıdakı xətlərə 2530 avtobus buraxılacaq

Sabahdan paytaxt Bakıda marşrut xətlərinə cəlb edilən avtobusların sayı son illərin rekord həddinə çatdırılır.

hadiseler.info xəbər verir ki, bu barədə Azərbaycan Yerüstü Nəqliyyat Agentliyi (AYNA) məlumat yayıb.

Məlumata görə, yeni tədris mövsümü ərəfəsində artan sərnişin tələbatını qarşılamaq üçün xətlərdə eyni vaxtda 2530 avtobusun istismarı təmin ediləcək. Bu, ötən illə müqayisədə təxminən 200 avtobus çoxdur.

Son 5 ilin statistikasına nəzər salsaq, marşrut xətlərindəki avtobus sayında ciddi artım müşahid olunub:

 2022-ci il: 1780 avtobus

 2023-cü il: 2011 avtobus

 2024-cü il: 2180 avtobus

 2025-ci il: 2340 avtobus

 2026-cı il: 2530 avtobus

Beləliklə, cəmi 5 il ərzində paytaxtda xətlərə cəlb olunan avtobusların sayı 750 ədəd (42%) artırılıb.

Bildirilib ki, metro xətlərinin ayrılması layihəsi çərçivəsində son bir ay ərzində 8 ekspres marşrut təşkil olunub və 28 müntəzəm xətt gücləndirilib. Eyni zamanda, bu il 29 xətdə nəqliyyat vasitələri daha yeni və müasir avtobuslarla əvəz olunub. İlin sonuna qədər özəl və dövlət müəssisələri tərəfindən gətirilən 308 yeni avtobusun da daxil olduğu parkın yenilənməsi prosesi davam etdiriləcək.