Şeyx Prezident İlham Əliyevə təşəkkür edib

Qafqaz Müsəlmanları İdarəsinin sədri Şeyxülislam Allahşükür Paşazadə Azərbaycan Prezidenti İlham Əliyevə ona göstərilən diqqət və verilən qiymətə görə minnətdarlığını bildirib

hadiseler.info xəbər verir ki, Şeyxülislam bu barədə dövlət başçısının Türk Dövlətləri Təşkilatının, Qafqaz Xalqları Ali Dini Şurasının və beynəlxalq konfransların nümayəndə heyətlərini qəbul edərkən danışıb.

Allahşükür Paşazadə ölkəmizin İlham Əliyevin rəhbərliyi ilə böyük uğurlar qazandığını vurğulayaraq deyib: “Sizin rəhbərliyinizlə suverenliyimizin, ərazi bütövlüyümüzün tam şəkildə bərpa edilməsi bizim üçün böyük ərməğan olub. Biz onu ancaq röyalarımızda görürdük, fikirləşirdik. Amma həyatda Allah-taala mənə nəsib etdi. Çünki bəzi adamlar var idi, deyirdilər ki, bu, ola bilməz, biz buna inanmırıq. Amma əlhəmdülillah, sizin rəhbərliyinizlə, siyasətinizlə, apardığınız həm daxili, həm xarici siyasət, həm xalqın birliyi ilə qələbə qazandıq, zəfər qazandıq”.

Şeyxülislam həmçinin dövlət başçısının qarşısına böyük vəzifələr qoyduğunu və İslam dünyasında qardaşlığın, Azərbaycanın tolerantlıq modelinin dünyada təbliği üçün əlindən gələni edəcəyini diqqətə çatdırıb.