Sumqayıtda yaşayış binasında yanğın: Sakinlər təxliyə olundu

Sumqayıt şəhərinin 34-cü məhəlləsində yerləşən beşmərtəbəli yaşayış binasında yanğın baş verib. Məlumat Fövqəladə Hallar Nazirliyinin (FHN) “112” qaynar telefon xəttinə daxil olan kimi əraziyə dərhal FHN-in Dövlət Yanğından Mühafizə Xidmətinin Sumqayıt Şəhər Yanğından Mühafizə İdarəsinin qüvvələri cəlb olunub.

“Qafqazinfo”ya istinadən xəbər verilir ki, operativ müdaxilə sayəsində binanın pilləkən qəfəsindəki elektrik lövhəsində başlayan yanğının mənzillərə keçməsinin qarşısı alınıb və alov qısa müddətdə söndürülüb. Hadisə nəticəsində 2 paqon-metr elektrik kabeli və 6 ədəd elektrik sayğacı yanıb.

Təhlükəsizlik tədbirləri çərçivəsində yanğınşünaslar tərəfindən 2-si azyaşlı olmaqla 6 bina sakini təhlükəsiz əraziyə təxliyə edilib. Bina və mənzillər yanğından mühafizə olunub.