Suraxanıda əməliyyat: 32 kiloqram narkotik vasitə ələ keçirildi- VİDEO

Suraxanı rayonunda polis əməkdaşları tərəfindən keçirilən əməliyyat zamanı külli miqdarda narkotik vasitənin qanunsuz dövriyyəsinin qarşısı alınıb.

hadiseler.info xəbər verir ki, Daxili İşlər Nazirliyinin (DİN) yaydığı məlumata əsasən, Suraxanı Rayon Polis İdarəsinin əməkdaşları tərəfindən həyata keçirilən tədbirlər nəticəsində narkotiklərin qanunsuz dövriyyəsində şübhəli bilinən M.Buqlov saxlanılıb.

Keçirilən baxış zamanı şübhəli şəxsdən 32 kiloqram narkotik vasitə aşkarlanaraq götürülüb. Araşdırmalarla saxlanılan şəxsin narkotikləri sosial şəbəkələr vasitəsilə tanış olduğu xarici ölkə vətəndaşından əldə etdiyi və paytaxt ərazisində satışını təşkil etmək üçün müxtəlif ünvanlara çatdırmağı planlaşdırdığı müəyyən olunub.

Faktla bağlı cinayət işi başlanılıb, məhkəmənin qərarı ilə M.Buqlov barəsində həbs qətimkan tədbiri seçilib.