Tramp Venesuelanın ona göndərdiyi bahalı hədiyyədən danışdı

ABŞ Prezidenti Donald Tramp Venesuelanın 1 milyon barel neft daşıyan tankeri şəklində göndərdiyi hədiyyəni yaxın saatlarda Texas ştatının limanlarından birində qəbul etməyi planlaşdırır.

hadiseler.info xəbər verir ki, bu barədə “The Guardian” nəşri məlumat yayıb.

Tramp jurnalistlərlə söhbətində Venesuelanın ABŞ-yə təmənnasız verdiyi nefti daşıyan tankeri Texasda yoxlayıb-yoxlamayacağı ilə bağlı suala müsbət cavab verib. O qeyd edib: “Biz Venesuelanı çox uğurla nəzarət altına aldıq. Onlar mənə hədiyyə olaraq 1 milyon barel neft göndəriblər. Mən də bunu Amerika Birləşmiş Ştatlarına təhvil verirəm”. ABŞ lideri əlavə edib ki, qəbul ediləcək 1 milyon barel neft ölkənin istifadəsinə veriləcək.

Eyni zamanda, Donald Tramp dünya bazarlarında neftin qiymətlərinin çox tezliklə və kəskin şəkildə aşağı düşəcəyini proqnozlaşdırıb. Amerika mətbuatının məlumatına görə, o, Venesuela nefti daşıyan tankeri Port-Artur limanında şəxsən yoxlayacaq.

Xatırladaq ki, yanvarın 3-də ABŞ Venesuelada mülki və hərbi obyektlərə hücum edərək Prezident Nikolas Maduro və həyat yoldaşı Siliya Floresi ölkədən çıxarıb. Hazırda Venesuelada dövlət başçısının səlahiyyətlərini keçmiş icraçı vitse-prezident Delsi Rodriges icra edir.