Trampdan yeni vəd: Hər amerikalıya 5 min dollar ödənilə bilər

ABŞ Prezidenti Donald Tramp aralıq seçkilər ərəfəsində vətəndaşlara yönəlmiş maliyyə vədi ilə diqqət çəkib.

hadiseler.info xəbər verir ki, Tramp Alabama ştatının Mobil şəhərində keçirilən mitinqdə “Tramp dividendi” vədini yenidən gündəmə gətirib.

ABŞ lideri bildirib ki, Respublikaçılar Nümayəndələr Palatası və Senatda çoxluğu qoruyub saxlayacağı təqdirdə, ölkədəki hər bir yetkin ABŞ vətəndaşına 5 min dollar ödənəcək. Tramp bu ödənişin əsas şərti kimi vəsaitin yalnız ABŞ daxilində xərclənməli olduğunu vurğulayıb.

Proqramın ümumi dəyərinin təxminən 1 trilyon dollar olacağını qeyd edən Prezident, maliyyələşmə mənbəyi kimi gömrük tariflərindən əldə olunan gəlirləri göstərib. Hesablamalara görə, ölkədə 18 yaşdan yuxarı 240-245 milyon vətəndaşın olduğunu nəzərə alsaq, layihə 1,2 trilyon dollardan çox vəsait tələb edə bilər.

Lakin bu təklif avtomatik icra olunmur. ABŞ Nümayəndələr Palatasının spikeri Mayk Conson bildirib ki, belə bir ödəniş proqramının həyata keçirilməsi üçün Konqresin qanunvericilik təsdiqi mütləqdir.