Ukraynada kiberdələduzluq şəbəkəsinə qarşı əməliyyat keçirilib- VİDEO

Azərbaycan Daxili İşlər Nazirliyinin (DİN) hüquq-mühafizə orqanları Ukraynada Azərbaycan vətəndaşlarını aldadaraq külli miqdarda pul vəsaitlərini ələ keçirən kiberdələduzluq şəbəkəsinə qarşı uğurlu əməliyyat həyata keçirib.

hadiseler.info xəbər verir ki, şəbəkənin fəaliyyəti Ukraynanın müxtəlif şəhərlərində xidmət ofisləri adı altında yaradılmış “Call Center”lər vasitəsilə təşkil olunub. Cinayətkar dəstə “Telegram” platformasında yüksək əməkhaqqı vəd edən saxta iş elanları vasitəsilə vətəndaşları qanunsuz mərkəzlərə cəlb edib. Həmin mərkəzlərdə xüsusi ssenarilərlə Azərbaycan vətəndaşlarına zəng edən dəstə üzvləri özlərini hüquq-mühafizə, bank və mobil operator əməkdaşları kimi təqdim edərək psixoloji manipulyasiya və qorxu yaratmaqla vəsaitləri ələ keçiriblər.

Ukrayna Daxili İşlər Nazirliyi ilə qarşılıqlı əməkdaşlıq çərçivəsində Kiyev şəhərində keçirilən tədbirlərlə qanunsuz “Call Center”lərdə işləyən 11 nəfər saxlanılaraq Azərbaycana gətirilib. Beynəlxalq axtarışda olan əsas təşkilatçılar – Nəriman İskəndərov, Elsun Əliyev, Elşad Musayev və Elşən Şükürov barəsində məhkəmənin qərarı ilə həbs qətimkan tədbiri seçilib.

Bundan başqa, kiberdələduzluq yolu ilə əldə edilən vəsaitlərin leqallaşdırılmasında iştirak edən Ruslan Zakirov, Yasəf Bayramov, Elsevər Məmmədov, Dmitri Duşin və Ruslan Matveyev də müəyyən edilərək istintaqə cəlb olunublar. Onların talanmış pulları kart hesablarında cəmləyərək kriptovalyutaya çevirib xaricə göndərdikləri məlum olub. Faktla bağlı cinayət işi başlanılıb, araşdırmalar davam etdirilir.