Xırdalan-Sumqayıt qatarı bərpa olunur

“Azərbaycan Dəmir Yolları” QSC (ADY) Xırdalan–Sumqayıt istiqaməti üzrə sərnişin qatarlarının reyslərini yenidən fəaliyyətə qaytarmağa hazırlaşır.

hadiseler.info xəbər verir ki, bu barədə səhmdar cəmiyyətinin mətbuat xidməti rəsmi məlumat yayıb.

Bildirilib ki, “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində Xırdalan–Güzdək sahəsində dəmir yollarının altından keçən yeni avtomobil yolu keçidinin inşası artıq tamamlanıb. Bununla da qatarların sözügedən marşrut üzrə hərəkətinin bərpası üçün hazırlıq mərhələsinə start verilib.

Mütəxəssislər tərəfindən Xırdalan–Sumqayıt sahəsində yol infrastrukturuna baxış keçirilir və yeni reyslər üçün nəzərdə tutulan hərəkət tərkiblərinin təmiri yekunlaşdırılır. Qatarların Bakı-Xırdalan-Sumqayıt marşrutu üzrə fəaliyyəti yeni tədris ili başlayana qədər tam bərpa ediləcək.

Qatarlar əvvəlki qaydada haftənin bütün günləri mövcud dayanacaqlar üzrə sərnişinlərə xidmət göstərəcək.